A Plataforma para a Defensa da Sanidade Pública da Área de Vigo quere mostrar a súa satisfacción e o seu agradecemento ao Concello de Vigo pola concesión deste galardón.
Consideramos que esta honra é un recoñecemento ao esforzo dos múltiples colectivos que a integran, que veñen traballando desde comezo dos anos 90 pola mellora da sanidade pública de Vigo en temas como os servizos de urxencias, a denuncia das listas de espera, a oposición á segregación discriminatoria dun área de poboación sen acceso ao hospital publico de Vigo, á privatización nos anos noventa da alta tecnoloxía a través de MEDTEC, a oposición á privatización do novo hospital de Vigo cuxo financiamento, construción e xestión adxudicouse a un consorcio de empresas privadas polo modelo PFI e, moi importante, á previsible redución do proxecto orixinal deste hospital en camas, servizos, e dispositivos docentes e de investigación.
A Plataforma é unha alianza de organizacións sociais, veciñais, de usuarias e usuarios da sanidade, de enfermos con patoloxías crónicas, de organizacións profesionais da sanidade, de sindicatos e de partidos políticos. Todas elas, por encima de lóxicas diferenzas de puntos de vista, áreas de interese e de obxectivos, puxeron en común algo moi sinxelo que case todo o mundo entende e que a cidadanía valora: a sanidade publica é un ben moi importante para o benestar dos cidadáns, e debe mellorarse e fortalecerse.
Traballamos en Rede, por consenso democrático e estamos abertos a toda organización ou persoa que comparta a idea dunha sanidade pública, equitativa, accesible e de calidade, para toda a cidadanía da área de Vigo.
A Plataforma en consecuencia, apoia todo o que reforce a calidade da sanidade pública viguesa veña de onde veña; e opúxose e oporase a todo o que a debilite e fragmente, tamén proceda de onde proceda.
Consideramos que a distinción do Concello de Vigo, mais que un premio a quen dedicamos o noso tempo e esforzo, é un premio á cidadanía da área de Vigo que deu repetidamente nas rúas da cidade un exemplo único en Europa, defendendo o seu sistema sanitario público dos ataques neoliberáis que pretenden a súa privatización. Vigo é un referente na loita da cidadanía en defensa dos seus servizos públicos e numerosas publicacións sanitarias a nivel nacional e internacional fixéronse eco destas actividades que innovaron as formas de intervención social e profesional na mellora sanitaria.
Como representantes da Plataforma sentímonos compracidos por facer todo o posible por atraer investimentos sanitarios á comarca de Vigo, claramente discriminada respecto de áreas similares doutras zonas de Galicia. Con todo comprobamos que a maioría dos investimentos sanitarios foron desviadas, desde fai décadas, a entidades alleas ao SERGAS. Como consecuencia existen importantes déficits en Vigo e a súa área metropolitana no que incumbe a infraestruturas hospitalarias, centros de alta resolución, centros de saúde e tecnoloxías sanitarias avanzadas..
Desde a Plataforma, non nos limitamos a denunciar e promover mobilizacións cidadás e profesionais na defensa e mellora dos nosos servizos sanitarios, senón que tamén realizamos traballo de investigación sobre a situación e necesidades hospitalarias, de atención primaria, saúde mental e atención sociosanitaria: no ano 2000 elaboramos o Informe REVISAN, que incluía propostas en cada un destes niveis asistenciais entre os que cabería destacar a proposta de construír un Novo Hospital en Vigo que agrupase todos os recursos dispersos en diferentes centros, moitos deles xa obsoletos ou en mans privadas, cunha xerencia e porta de urxencias únicas, que unificase todos os recursos e dotase ao centro dun potente carácter universitario e investigador como centro de referencia do cancro en Galicia.
Como vimos denunciando aos longo dos últimos anos este proxecto está en perigo coa proposta de financiamento e xestión privada (Modelo PFI) que pretende recortar os seus recursos, renunciar ao seu carácter estratéxico e manter a dispersión de recursos, a presenza privada e a fragmentación das urxencias. A masiva participación nas sucesivas manifestacións convocadas pola Plataforma deixan ben claro o rexeitamento da maioría da cidadanía da área de Vigo e do seu tecido social e institucional a esta alternativa.
Vigo, 24 de marzo de 2011
Plataforma Para a Defensa da Sanidade Pública da área de Vigo
