Farjas ve motivos políticos na protesta sanitaria do domingo

Apela á responsabilidade e a respectar o criterio do bo traballo asistencial 

A manifestación convocada o domingo pola plataforma SOS Sanidade Pública para rexeitar a privatización da asistencia foi rexeitada onte pola conselleira Farjas, quen fixo unha "chamada á responsabilidade" e a "respectar a seriedade e o criterio de bo traballo que debe rexer sempre a actividade asistencial" nos centros de saúde e hospitais. "Nunca entenderei que obxectivos políticos intenten converter boas noticias en malas. Nunca debería ser a proximidade dunhas novas eleccións motivo para crear inquietudes ou conflitos no ámbito sanitario", manifestou a titular de Sanidade en relación ás críticas polo modelo de financiamento público-privado para construír infraestruturas sanitarias. Fronte á manifestación, Farjas insistiu en que "a sanidade pública galega é cento por cento pública" e "todos os hospitais son cento por cento públicos".