Apenas inaugurados dous dos seus seis edificios, nesta etapa inicial de apertura ao público o complexo do monte Gaiás (Santiago) xa vai absorber do erario cada mes, redondeando, dous millóns de pesetas (12.000 euros) en concepto de combustible de calefacción. Consultada respecto diso, a consellería dirixida por Roberto Varela non só cualifica ese gasto de «razoable», senón que o sitúa un 18% por baixo dos estándares españois.
Vía concurso ordinario convocado antonte cun prazo de 20 xornadas para a formulación de ofertas, a Fundación Cidade da Cultura busca unha compañía que a abasteza de gas natural para producir calor nos seus dominios entre mediados desta primavera e o ecuador da próxima. Neses 365 días, o provedor haberá de fornecer 295.000 metros cúbicos de hidrocarburo, cantidade suficiente para cubrir a demanda enerxética global de 6.950 fogares tipo unha semana. Como máximo, cobrará -IVE incluído- 149.000 euros durante o ano de vixencia do contrato, o cal arrincará con só un terzo do recinto operativo (biblioteca e arquivo), aínda que se prevé que acabe co Museo de Galicia e os Servizos Centrais en funcionamento.
Tendo iso en conta, a Xunta sostén que o consumo na parte visitable das instalacións ao longo de todo ese período «non será elevado, grazas ao illamento dás construcións», apostila unha fonte institucional. De feito, cífrao en 90 quilowatts hora por metro cadrado, «cando a media nacional é superior aos 110». Do cal se colige que, unha vez abertos todos os inmobles deseñados por Peter Eisenman, a climatización anual do conxunto custará medio millón de euros.
No hay comentarios:
Publicar un comentario