A Plataforma en Defensa dá Sanidade Pública de Monforte teme que a Consellería de Sanidade aproveite as vacacións de verán para tratar de sacar adiante o decreto da área sanitaria sen causar balbordo. Portavoces deste colectivo recordaron onte que fai 386 días que o presidente da Xunta, Alberto Núñez Feijoo, prometeulles á entrada dun mitin do PP local, que a orde que desenvolvería a aplicación en Monforte do decreto das novas áreas sanitarias de xestión integrada sería dos primeiros en saír. Desde entón, os representantes desta plataforma cidadá non deixan de recordarllo cada vez que teñen ocasión.
En vésperas de que comece o período central de vacacións do persoal sanitario e o habitual peche de camas no hospital, unha decena de integrantes da plataforma compareceron onte nunha rolda de prensa na sede local do colexio de enfermería para advertir á Xunta que seguen á expectativa e que se o que di no decreto non garante o actual nivel de autonomía da área sanitaria de Monforte e o seu hospital eles responderán.
A publicación do decreto é precisamente a primeira das nove reivindicacións que a plataforma difundiu onte, e entre as que se contan tamén demandas xa coñecidas, como a continuidade das gardas de radioloxía con especialistas presentes, a crítica á derivación de pacientes de cirurxía a clínicas privadas ou a posta en marcha da varias veces aprazada unidade de coidados intensivos no hospital comarcal de Monforte. «Estamos aquí e imos seguir estando -dixo Maribel García- , porque a plataforma non se acabou coas eleccións, como dicían algúns».
Solidariedade con Escairón
A plataforma en defensa da sanidade pública anunciou onte o seu respaldo ao mantemento das catro consultas médicas do centro de saúde de Escairón, ante a decisión de Sanidade de pechar unha delas, co argumento de que o cociente de pacientes por médico é moi inferior á media do conxunto de Galicia.
Maribel García aproveitou a ocasión para botarlle en cara ao alcalde do Saviñao, Joaquín González, que non quixese recibilos durante a campaña das eleccións municipais. «Non quixo falar connosco disto, que xa estaba anunciado, porque seica non dicíamos a verdade», asegurou con ironía a portavoz da plataforma.
No hay comentarios:
Publicar un comentario