A residencia do Morín funcionará a pleno rendemento a fins de xaneiro

Geriatros garante que o 90% dos 110 traballadores que terá o persoal serán da comarca

A residencia xeriátrica do Morín, en Monforte, empezará a funcionar a pleno rendemento entre finais de xaneiro e principios de febreiro, segundo as estimacións da empresa Geriatros, que onte presentou por primeira vez as súas instalacións. Segundo indicou o subdirector xeral técnico da firma, José Manuel Pazos, a residencia poderá albergar ata 180 persoas e dispón ademais dun centro de día para afectados de alzhéimer e outras enfermidades neurodegenerativas, con corenta prazas de capacidade, que empezará a funcionar a semana próxima. Geriatros xa nomeou á directora da residencia, María Veloso Soto, que onte non puido participar na presentación.