O PSdeG acusa a dereita de "regalar" a sanidade pública

Pachi Vázquez considera que o Executivo autonómico só contenta "os amigos de Madrid" mentres se disparan as listas de espera.

O secretario xeral do PSdeG, Manuel "Pachi" Vázquez, acusou o presidente da Xunta, Alberto Núñez Feijóo, de "regalar a sanidade pública os amigos de Madrid" mentres se disparan as listas de espera e pechan quirófanos". Na súa visita á Agrupación Socialista de Arzúa (A Coruña), Vázquez recriminoulle, ademais, ó PP que use "o diñeiro público para obter beneficios partidistas" e entender as administracións locais "como lugares para colocar os seus militantes".
O líder dos socialistas galegos sinalou, respecto diso, que o PP destina na Deputación de Ourense o 43% do orzamento para pagar os salarios do persoal, "do que o 90% está integrado por concelleiros deste partido". Neste sentido, acusou os populares de "utilizar o beneficio público en beneficio dos seus militantes, concelleiros ou cargos, ou ben xerando postos de traballo directos ou creando unha rede clientelar de control do país con fondos públicos".
Así mesmo, Vázquez contrapuxo a "ilusión, compromiso e solucións" propostas polos socialistas galegos cun "Feijóo que aumenta o prezo da auga, o do tratamento de lixo e reduce as prestacións sociais".
Respecto diso, apuntou que o PP pasou de "ter solución para todo en 45 días" a "dous anos despois" de entrar no Goberno galego "ter máis paro que nunca, pechar máis empresas que nunca, reducir as bolsas á metade e non ter financiamento universitario".