A Consellería de Sanidade optou por non acudir á reunión convocada na mañá deste xoves polo Ministerio de Sanidad en Madrid para proseguir a negociación sobre a lei galega de racionalización do gasto farmacéutico, recorrida polo Goberno central ante o Tribunal Constitucional (TC), que suspendeu cautelarmente a aplicación do catálogo priorizar de medicamentos, ao non o trasladar o Goberno "novas propostas".
Segundo confirmaron a Europa Press este xoves fontes da Consellería de Sanidade, a Xunta decidiu non enviar aos seus representantes á reunión, fixada para as 11.00 horas polo Ministerio --a través dunha carta remitida á titular de Sanidade, Pilar Farjas--, ao non haber "compromisos" que xustifiquen o encontro.
Deste modo, Sanidade recalcou que condiciona un novo encontro cos representantes do Ministerio de Leire Pajín a que presenten "novas propostas" para avanzar na negociación, que permanece encistada dende a reunión mantida o pasado día 9 en Santiago entre representantes de ambas as dúas institucións.
Por iso, Sanidade procedeu a solicitar a Comisión Bilateral de Cooperación co Ministerio de Política Territorial e Administración Pública "no intento de alcanzar unha solución extraprocesual", segundo lle transmitiu Farjas a Pajín nunha carta remitida o mércores, na que a conselleira reiteraba a vontade de diálogo da Xunta pero esixía unha "resposta concreta e compromisos fidedignos" que xustificasen un novo encontro entre as partes.
VONTADE DE DIÁLOGO
Pola súa banda, o Ministerio daba por feito na tarde do mércores que os representantes de Sanidade non acudirían a Madrid este xoves, malia que non tiñan confirmación oficial.Non obstante, o secretario xeral de Sanidad, José Martínez Olmos, reiterou a vontade de manter un novo encontro coa Xunta, ao tempo que subliñou que "non é un pulso político", senón que o Ministerio pretende "axudar" a Galicia a "introducir as modificacións que permitan" que a normativa recorrida ante o TC "sexa constitucionalmente válida".
No hay comentarios:
Publicar un comentario