O líder do PSdeG, Pachi Vázquez, acusou hoxe á Xunta de primar con 30 euros aos médicos para que dean a alta aos pacientes sen solicitar máis probas diagnósticas complementarias, para alixeirar as listas de espera.
Durante a sesión de control ao presidente da Xunta, Alberto Núñez Feijoo, no Parlamento de Galicia, Vázquez denunciou que este é o «novo método» do PP para retomar as «peonadas», que suprimiu ao comezo da lexislatura.
O presidente galego pediu «perdón» aos médicos galegos polo «espectáculo bochornoso» ofrecido, na súa opinión, polo líder dos socialistas galegos, a quen recomendou que pida a baixa no colexio médico de Ourense por esta actitude.
«Non vale todo en política. Acuse aos parlamentarios e ao Goberno, pero non a máis de dez mil médicos de incumprir o xuramento hipocrático», díxolle Núñez Feijoo.
O líder do PSdeG invitou ao presidente galego a que lle desminta que calquera médico do hospital da Mariña non estará primado hoxe con 30 euros por dar a alta a un paciente sen realizar máis probas diagnósticas complementarias.
Para Vázquez trátase dunha «perversión» da sanidade pública.
Unha sanidade pública que tamén foi o eixo das críticas do líder do PSdeG á Xunta polo intento, na súa opinión, de privatizala.
O dirixente do PSdeG afirmou que a Xunta dará hoxe o «tiro de graza» á sanidade pública para máis de 600.000 galegos do sur de Galicia coa adxudicación do hospital do Vigo.
«Vostede é o verdugo da sanidade publica», dixo Vázquez, «porque decidiron facer un hospital que non quere ninguén e que ninguén espera por el», reprochoulle.
Segundo Vázquez, a Xunta vaille regalar a grupos sanitarios amigos» o hospital de Vigo, que custa 374 millóns, segundo os seus cálculos, «e vaino a regalar por 1.378», o que creará unha «brecha» entre o norte e o sur da Comunidade, con sanidade pública para uns e privada para outros galegos.
No hay comentarios:
Publicar un comentario