O Estado di que a Xunta "mercadea" coa tarxeta sanitaria dos emigrantes

O Goberno lembra que xa existen mecanismos que garanten a cobertura sanitaria dos emigrantes cando viaxan a España

O secretario xeral da Emigración, Santiago Camba, leva días visitando centros e irmandades galegas en Suramérica. Alí, asina convenios de colaboración para realizar a tramitación previa á emisión da tarxeta sanitaria para emigrantes. Con este acordo, segundo aclara a Xunta, “cidadáns galegos de Buenos Aires, Montevideo, México ou Venezuela poden viaxar a Galicia coa seguridade de que van recibir a mesma atención sanitaria que calquera outro galego”.

Deste xeito, o Goberno de Feijóo espera que 3.000 galegos emigrantes se beneficien anualmente da cobertura total do Sergas nas súas viaxes a Galicia. Pero o Estado responde. Segundo asegura a Dirección Xeral de Cidadanía Española no Exterior, “xa existen mecanismos dabondo para garantir a cobertura sanitaria dos emigrantes durante as súas visitas a España”. “O que fai a Xunta é un mercadeo político cos emigrantes”, engaden.

Fontes do Goberno central insisten en que desde hai preto de 40 anos existen convenios para garantir a sanidade a españois en tránsito. A través dunha solicitude nos consulados e nos departamentos de Traballo, os residentes ausentes poden acceder á cobertura sanitaria.