Arrinca o proceso para nomear a médicos eméritos ata os 72 anos

Trátase de persoal xubilado con méritos que traballe para o Sergas polo menos un decenio

A Xunta publicou xa a regulación para nomear a médicos eméritos na sanidade pública galega. O Diario Oficial de Galicia recollía onte a orde de desenvolvemento deste proceso, que iniciará a xerencia integrada á que pertencía o facultativo antes da súa xubilación. Como polo momento aínda non se crearon estas xerencias integradas en toda a comunidade, serán os directores de atención especializada ou primaria quen o fagan.