O centro de saúde de Escairón quedará sen pediatra porque a profesional que ocupaba ese posto obtivo praza noutra localidade no recente concurso de traslados do Sergas e está a piques de marcharse. No municipio do Saviñao hai aproximadamente douscentos nenos de ata 14 anos que mentres non se resolva este problema terán que acudir ao médico ao centro de saúde de Monforte, que dispón de tres consultas de pediatría que atenden toda a poboación infantil deste municipio e os dunha parte do resto da comarca.
A marcha da pediatra anunciouna onte o BNG do Saviñao, que reclama á Consellería de Sanidade que cubra a vacante canto antes e ao Concello que faga toda a presión posible nesa dirección.
Segundo a información facilitada por esta formación política, a pediatra que atende a consulta en Escairón presentouse ao concurso de traslados organizado polo Sergas para consolidar as prazas dos médicos interinos que traballan na sanidade pública. Ela obtivo a súa praza noutro destino distinto, pero ningún outro profesional pediu ocupar a súa vacante neste proceso, de forma que agora chega o momento do traslado e non parece que haxa substituto á vista.
Culpa dos recortes
O Bloque levará este asunto ao pleno que celebrará o venres a corporación do Saviñao. Os portavoces desta formación política neste municipio quéixanse de que este traslado «obrigará aos pais a trasladar aos nenos e nenas ao centro de saúde de Monforte, xa de por se masificado».
Eles consideran que esta situación é o froito da política de «redución do gasto sanitario» que está a aplicar a Consellería de Sanidade. Os nacionalistas sosteñen que a deterioración da sanidade pública nótase en casos como este e no «incremento dás listas de espera ou a derivación a centros privados concertados».
No hay comentarios:
Publicar un comentario