O Sergas estende a toda Galicia o teléfono 902 para citas médicas

As áreas de Vigo, A Coruña e Ferrol súmanse ao número único para consultas co doutor de cabeceira.

La Voz de Galicia

O Servizo Galego de Saúde está a piques de levar a todos os cidadáns un servizo telefónico de cita previa para o médico de cabeceira. A central de chamadas serve para que calquera paciente poida pedir unha consulta no seu centro de saúde. Todos o farán a través dun número único, de maneira que non sexa necesario chamar a cada centro de saúde.

Ata agora, os habitantes das áreas sanitarias de Ourense, Lugo, Santiago e Pontevedra xa tiñan esta posibilidade. Sumaban 1,4 millóns de persoas (o 52% da poboación galega), aos que agora se une o resto de Galicia. Así pois, incorporaranse as áreas de Vigo, A Coruña e Ferrol.

En poucas semanas porase en marcha, porque o Sergas xa adxudicou o contrato á unión de empresas Contacnova-Centro de Atención de Chamadas. Esta firma ten o encargo de contratar operadores telefónicos que atendan as chamadas dos cidadáns para xestionar as citas. Recibirá por iso 1.659.788 euros durante un ano.

O teléfono do que se fará cargo é o 902 077 333, un servizo que se coñece como Saúde en liña . Aínda que é un 902, e xa que logo de tarifa elevada, ata agora existían outros números asociados: 988 398 350 (Ourense), 982 269 893 (Lugo), 981 952 950 (Santiago) e 986 806 350 (Pontevedra).

O Goberno bipartito puxo en marcha a central de chamadas e pretendía estendela a toda Galicia. O proxecto quedou suspendido co envorco electoral de marzo do 2009. Cultivara unha forte oposición sindical. As centrais clamaban contra o que consideraban unha privatización do servizo.

Agora a Xunta retoma o proxecto a través da empresa pública Galaria (o antigo Instituto de Medicina Técnica, Medtec), que realiza labores de asesoría para o Sergas e ten unidades asistenciais de alta tecnoloxía no sur de Galicia.

Chamadas automáticas

Coa central, a Administración pretende ir automatizando as chamadas, de maneira que o paciente sexa atendido por unha central e non por unha persoa, grazas a un sistema de recoñecemento de voz. Así consta no contrato xa adxudicado polo Sergas, que di que é necesario «reducir o número de persoas que deban ser atendidas persoalmente por operadores». Ademais, quere que estea operativo as 24 horas do día, xa que agora só se pode solicitar unha consulta co médico de cabeceira entre as 8 e as 21 horas, de luns a venres.

Actualmente, o servizo de cita previa que atende a 1,4 millóns de persoas conta con 80 traballadores a tempo parcial e dous a tempo completo. Grazas a este sistema, sábese que o luns é o día en que se producen máis chamadas en Galicia para pedir cita co médico de cabeceira. En concreto, unha de cada tres chamadas. E delas, a metade xestiónanse entre as oito e as once da mañá.

Os profesionais de atención primaria de Galicia pasan máis de 100.000 consultas diarias.