O presidente asegurou ao mediodía que o Ministerio lle ha había afirmado que só quere manter "unha reunión ou reunións" para analizar se existe "invasión competencial".
Xornal.com
O Ministerio de Sanidade reiterou este xoves a súa intención de recorrer a lei pola que se crea o catálogo priorizado de medicamentos galego porque "invade competencias do Estado", despois de que o presidente da Xunta , Alberto Núñez Feijóo, sinalase que lle asegurou que "non quere" acudir aos tribunais, senón manter "unha reunión ou reunións" para analizar se existe "invasión competencial".
Segundo manifestaron fontes do departamento de Leire Pajín a Europa Press, o ministerio "segue aberto, como desde o primeiro día, a alcanzar fórmulas alternativas para solucionar problemas de financiamento" do gasto farmacéutico, pero "sempre baixo o principio de non invadir competencias".
Deste xeito, o ministerio insistiu en que "se respecte o marco competencial de cada un" e en relación ao catálogo de fármacos galego, que entrou en vigor o pasado día 3 de xaneiro, recalcou que "hai invasión competencial" porque, recalcou, "invade competencias do Estado".
"Se se persiste no catálogo, a idea de recorrer segue adiante", aseguraron as fontes do Ministerio de Sanidade consultadas.
"Se imos falar é para que non haxa catálogo e non para outra cousa", puntualizaron as mesmas fontes, á vez que sentenciaron que o ministerio non deixará de recorrer a norma galega "se se mantén unha lei que invade competencias do Estado".
VERSIÓN DE FEIJÓO
O presidente da Xunta , Alberto Núñez Feijóo, sinalou no Consello da Xunta deste mediodía que o Ministerio de Sanidade asegurou á Comunidade que "non quere" recorrer o catálogo priorizado de fármacos, senón manter "unha reunión ou reunións" para analizar se existe "invasión competencial".
"Que non a hai", reafirmouse Feijóo tras presidir a reunión semanal do seu Executivo, e antes de advertir a Sanidade de que sería "gravemente irresponsable" que "simultaneamente" lle traslade á industria farmacéutica unha versión contraria. "Se xa se comprometeu coa industria a recorrer, que o diga", reclamou Feijóo.
Pola súa banda, o máximo mandatario galego subliñou que as únicas "noticias" que ten, polo momento, sobre o catálogo son as que lle chegan dos facultativos e do Servizo Galego de Saúde (Sergas): "Que non hai problema". Por iso, manifestou o seu desexo de que "non os expoña" o Goberno de España.
A modo de argumento, explicou que cada día en vigor do catálogo supón "un aforro de 300.000 euros" que a Xunta destinará a financiar infraestruturas sanitarias e a rebaixar as listas de espera. Por iso, avisou de que "non renunciará" a estes fondos, antes de proclamar que "defenderá o diñeiro" da Comunidade.
Neste escenario, avogou por ter "sentido de Estado", sobre todo nun país "cuxo presidente", José Luís Rodríguez Zapatero, asegura que haberá "reformas con ou sen consenso". No polo oposto, salientou que o catálogo si conseguiu o acordo e o apoio de dous terzos da Cámara autonómica, que sería --lembrou-- "suficiente" para acometer a reforma estatutaria.
13 DE MAIO DE 2010
13 DE MAIO DE 2010: GRAZAS!!!
No hay comentarios:
Publicar un comentario