O sindicato Cesm volveu pór onte baixo o foco a situación das urxencias pediátricas no Complexo Hospitalario de Ourense. O tema non é novo xa que, de forma reiterada, denunciaron precariedade na calidade asistencial e sobrecarga dos profesionais. «A atención pediátrica vén sendo realizada por tan só dous pediatras ao día», denuncia o sindicato, sinalando que os facultativos en horario de garda deben asumir a urxencia, a planta de hospitalización, os coidados intensivos pediátricos, os coidados intensivos neonatales, as incubadoras, os partos e os traslados interhospitalarios. Segundo Cesm son dez os profesionais que realizan gardas -cada mes, entre seis e sete presenciais e entre tres e catro localizadas- e, deles, dúas teñen contratos eventuais: «Viron empeorada a súa situación laboral con renovacións de contrato mensuais, inferiores ás que previamente tiñan».
O sindicato médico acusa á dirección do Chou de «absoluta irresponsabilidade» e esixe a contratación estable dos médicos eventuais. Así mesmo, reclama un esforzo para mellorar a situación laboral do resto de profesionais que cobren as urxencias pediátricas.
Desde a dirección do Chou explicaron onte que ao servizo de pediatría están adscritos 25 médicos. Desde o seu punto de vista, o persoal está perfectamente dimensionada en función da poboación pediátrica. Os responsables do complexo hospitalario aseguran que, aínda que consideran que o persoal é suficiente, procedeuse á contratación de dous profesionais para as gardas. Tendo en conta que a idade media dos médicos do servizo é alta e que os maiores de 55 anos non están obrigados a realizar gardas, o Chou recoñece que é necesario un reforzo neste sentido.
Obrigatorio
Desde a dirección insisten en que os pediatras, do mesmo xeito que o resto de especialistas, están obrigados a asumir as súas funcións tanto nas plantas de hospitalización como nas consultas e en urxencias.
No hay comentarios:
Publicar un comentario